VADZIDZI vepaMutare Teachers’ College vasingagare pakoreji iyi vobatira hana mumaoko nekuda kwemumwe murume ari kufamba ari musvo uyo akatobata chibharo mumwe wavo nguva pfupi yadarika.Murume uyu anonzi anenge ari musvo akavhara kumeso kwake ne’balaclava’ kuti asazivikanwe.
Izvi zviri kuita kuti vadzidzi vepakoreji iyi pamwechete nevamwe vanhu vemuSakubva vagare vachitya.
Mutauriri wemapurisa kudunhu reManicaland, Assistant Inspector Wiseman Chinyoka, vanotsinhira nyaya iyi vachiti murume uyu akapindira vamwe vadzidzi vaviri vanoroja kuChinyausunzi, kuSakubva nguva pfupi yadarika.
“Nemusi wa29 Kurume nenguva dza11:30 manheru, vadzidzi vechikadzi vaviri (mazita avo tinawo) vaive vakarara muimba yavo yekurara apo vakamutswa nemurume asingazivikanwe. Aive ari musvo akapfeka ‘grey monkey hat’ iyo yaive yakavhara kumeso kwake uye aive akabata banga.
“Murume uyu akatyisidzira vamhan’ari nebanga kuti vasaridze mhere achiti anoda mari nezvimwe zvinokosha kubva kwavari,” vanodaro.
Zvichitevera kubirwa uku, murume uyu akazoudza vadzidzi vaviri ava kuti vabvise zvipfeko zvavo zvemukati uye vorara pasi.
Akazobata chibharo mumwe wevadzidzi vaviri ava pasina dziviriro ndokuzonyangarika nemurima apo aibuda ropa.
Chikonzero chakaita kuti abude ropa hachina kukwanisa kuzivikanwa.
Mutsetse weropa raidonha wakareba mamita makumi manomwe kubva panzvimbo iyi wakaonekwa apo mapurisa akasvika.
Vamhan’ari vaviri ava vakazoona kuti gonhi ravo raive rakavhurwa ndotaurira muvakidzani wavo nezvechiitiko ichi uyo akazivisa vamwe vagari vemunharaunda avo vakazomhan’ara nyaya iyi kumapurisa.
“Pavakasvika mapurisa emuSakubva, achiperekedzwa nevechikamu chinoshanda nembwa, akaona pasi, pamagumbeze nemachira emumwe wevamhan’ari zvine ropa.
“Pakange paine mutsetse weropa wakareba mamita angangosvika 70 kubva panzvimbo iyi, izvo zvakaita kuti vaiferefeta nyaya iyi vafungidzire kuti murume uyu anogona kunge akazvikuvadza panguva yaaipara mhosva iyi,” vanodaro Asst Insp Chinyoka.
